Wissen ma yeɣra tabratt-agi wezwaw? Ma yeɣra-tt, wissen ma yefhem lmeɛna-s?
I kečč a Muhend Azwaw d tezyiwin-ik. Adlis-a, ad ak-d-yefk yiwen n wudem n tmusni, ad ak-d-yeqqim d tigejdit, ad ak-d-yettales ayen gan d wayen nnan yimezwura-inek. M’ara t-walin medden ammar ad ilin wid ara d-ak-yinin :
- Tigi d tiḥkayin n zik-nni, d timucuha n teryel i yess ssedhuyen arrac, i wacu ara d aɣ-nefɛent tmucuha n zik, i nekni s at tura ? Eǧǧ timucuha n zik i yat zik ; nekni d arraw n wass-a, ass-a irgazen ulin s aggur, rsen deg-s, ass-a isufag ssemliliyen tamurt ɣer tmurt, ass-a deg yiwet n takurt tezmer ad tzebbel tamdint tameqrant deg usmenɣer n tiṭ.
Inni-y-asen:
- Tamusni tekka nnig n teswiɛin. Ur ttilit ara ay imedhac d arrac yessedhac uclawa, yesmenyafen arelluc aberreqmuc i yitij ireqqen neɣ i uwraɣ yuli uɣebbar.
Ini-y_asen:
- Awraɣ yif arelluc, ulac akk taqrint gar-asen : awraɣ kkes-as aɣebbar ad yirriq, arelluc cwit ma icellef-it d aclaf ad yeddegdeg d ticeqfatin tizraraqin.
Ini-y-asen:
- Awer tedru yid-wen ay at tura am useklu iwumi gezmen iẓuran : di tazwara, zegzaw yifer-is, di teswiɛt sellaw, ider. Ttejra mebla iẓuran leqrar-is d tamettant. Awer tilim ay at tura d isekla war yiẓuran.
Ini-y-asen :
-Tamacahut d ajlal n tmusni, kkes ajlal iwakken ad d-tedher temsirt yellan ddaw-as, acku…
Acku tamusni, ɣas tettabaɛ lewqat, ur teqqin ara ɣer-sen s umrar ur gezzmen lemqas. Si tallit ɣer tayeḍ tettbeddil tussna, tamusni ur tettbeddil ara. Si tallit ɣer tayeḍ i yettbeddilen di tmusni d ṣṣifa n sufella, mačči d ixf n daxel.
Maca, taɣawsa tis-snat, ay Azwaw, tamusni mačči d lwert kan, mačči d agni iwumi d-zzin leswar. Awan n tmusni d antag, d tikli ɣer zdat. Ma tgid-as algam, tenɣid-tt.
Ay Azwaw, ur as-tegg ara algam i tmusni. Anida ara tt-yessiwed lǧehd n ufud-is tawid-tt, ma s aggur, eǧǧ tamusni ad tali s aggur, ma s itran egg-as abrid s itran, ma awan-is d asemḥelleq i ddunit d wayen yellan, anef i tmusni ad tessemḥilleq i ddunit.
Taɣawsa tis-krad, tamusni ay Azwaw, d asafu. D asafu n tafat : eǧǧ asafu ad ifu, yessuzef tillas.
Tamusni d asafu n wurɣu : eǧǧ asafu ad isserɣ ayen yerkan, d wayen yeblan, d wayen ur nesɛi iẓuran. Egg-as asaber ɣef wayen yelhan, ɣef wayen yelḥan deg iberdan d amsebrid mačči d amenṭran.
Tamusni d asafu : wa yettak-it i wa, iwakken ad d-yezg dayem yeɛla, urǧin yettendella neɣ yulwa neɣ yeqqim am uɣerrus di tesga.
Ḥedreɣ yemmut umɣar aneggaru i d-yettawin abrid n tmusni : Newwi tafekka-s ɣer uẓekka ideg ara yenṭel. Mi nerra akal fell-as, nuɣal-d, nettmesmuqal am win iserɛen la d-yettaki. Yendel usafu gar-aneɣ iseg d-nettagwem tafat.
Ass-n, ay Azwaw, i k-id-mmektiɣ, i as-nniɣ : Ay imɛazzan n yiwen wass, ɣurwat ad tuɣalem d inehyaf n kullass si tmusni d tmuɣli taɣezfant, d tulya n wul d leɛqel. Mmektiɣ-k-id, mmektiɣ-d akk tisutwin ara d-yemlen. Amusnaw aneggaru nemḍel-it, daɣ nemḍel yid-s tamusni ? Ulac tijmuyaɛ d yigrawen ideg ara tḥefḍem tamusni akken i tt-ḥefḍen imezwura- nwen. Tura, tamusni tuɣal s idlisen. Degmi i uriɣ adlis-a i kečč, ay Azwaw, d tezyiwin-ik ad ak-d-yeqqim d tagejdit i usenned, d tagejdit i lebni.
Mulud At Mɛemmer.
Poèmes kabyles anciens,
Maspero, 1980, pp59-60
Poèmes kabyles anciens,
Maspero, 1980, pp59-60
