DDU D WEBRID-IK A LḤIF

Ur d iyi-ṭixxiṛ
Dayen nemsaɣ tannumi
Uma sriɣ i  lxir
Yid-ek imi sɛiɣ tamusni
Ma teǧǧiḍ-iyi ugadeɣ
Deg larbaḥ m ara ḍelqeɣ
Mi qennɛeɣ ad sfesdeɣ
Am wakken ur ɛenddant fell-i

Xas tḍurreḍ-iyi
Xnubṛeɣ ḍṣant tizzya-w
Xas tdulleḍ-iyi
Tefkiḍ udem i tagara-w
Qḍiɣ s tlufa-k lecɣal
Ur d-iqeṭṭu ḥed s lmal
W' ur k-njeṛṛeb d lmuḥal
A s-yini iḍerra wayla-w

Regg°len-ak medden
Ttag°aden-k a ten-id-tqesdeḍ
Ma d nek i-yessnen
D wid ak° tesneɛtabeḍ
Xas neqbar seg meṭtawen
Tudert nneɣ d asawen
S yiss-ek liser i t-nessen
Tin yeffren nebna s tayeḍ

Xas keṭṭren laɛyub
Ciṭuḥ nni n leqder yella
Ula d lmerɣub
D keč i s-isbedden lqima
W' ur k-njeṛṛeb di lawan
Ma ineṭḍ-it ciṭuḥ usennan
A s-yini d leɛǧeb i d-yerzan
Ur yettamen
A s-d-teḍru akka

Ddu d webrid-ik a lḥif
Neɣra neḥfeḍ di tussna-k
Ay nsemmeḥ-ak tidi d wadif
Mi ɣ-temliḍ tizi n leslak
                                           Matoub Lounes